Azərbaycan
Respublikasının İnsan Hüquqları üzrə Müvəkkil (Ombudsman) Aparatının
Elmi-analitik sektorunun müdiri Zaur Əliyev və Müvəkkil yanında Uşaq
Hüquqları Mərkəzinin əməkdaşı Faiq Ağayev Bakı şəhəri 134 saylı orta
məktəbin 9-10-cu siniflərinin fəalları ilə görüş keçirmişlər.
Tədbirdə şagirdlərə insan hüquq və azadlıqlarının, o
cümlədən uşaq hüquqlarının tarixi və nəzəri əsasları, Uşaq Hüquqları
Konvensiyası, uşaq hüquqlarının təmin edilməsində Ombudsmanın rolu və
uşaqlara dair həyata keçirilən dövlət proqramları haqqında ətraflı
məlumat verilmişdir.
Qeyd olunmuşdur ki, YUNİSEF-in Azərbaycandakı
nümayəndəliyi ilə birgə layihə çərçivəsində Ombudsman təsisatı yanında
Uşaq Hüquqları Mərkəzi yaradılmışdır. Həmin Mərkəzin regionlarda
maarifləndirmə işi aparılması, uşaq evlərində və internat məktəblərində
uşaqlara qarşı zorakılıq hallarının səbəblərinin araşdırılması və
gələcəkdə bu cür halların qarşısının alınması üçün tədbirlərin təşkili
ilə bağlı fəaliyyəti diqqətə çatdırılmışdır.
Həmçinin, görüş zamanı şagirdlərə dövlət uşaq
müəssisələrindən uşaqların ailələrə verilməsi (De-institutlaşma) və
Alternativ qayğı Dövlət Proqramının (2006-2015-ci illər) həyata
keçirilməsi prosesinin səmərəliliyini artırmaq, uşaqların vəziyyətini
araşdırmaq məqsədilə Müvəkkilin təşəbbüsü əsasında mütəmadi
monitorinqlərin keçirildiyi, bu uşaqların təhsilə cəlb olunması, onlara
səhiyyə və reabilitasiya xidmətlərinin göstərilməsinin vəziyyətinin
öyrənildiyi barədə məlumat verilmişdir.
Müvəkkilin nümayəndələri uşaqları maraqlandıran
sualları ətraflı cavablandırmışlar. Görüş qarşılıqlı fikir mübadiləsi,
canlı diskussiya şəraitində davam etmişdir.
|
